नयाँ दिल्लीको अति ब्यस्त जफ्फार मार्केट । कनोट प्यालेस करोल बाग भनेपछि झन प्रसिद्द । हालसालैको मेट्रो (राजधानी शहरमा मात्रै गुड्ने साना रेल) स्टेसनले गर्दा हजारौं मानिसको ओहोर दोहोर । चारैतिर भारतीय रेस्टुरेन्ट र पसलको खचाखच छ । ब्यापारीक केन्द्र भएकाले मानिसहरुको उत्तिकै भागभाग र दौडा दौड् छ । यहि ब्यस्त सडकको एक कुनामा बसेर जनकपुरका सुभास राई र गुल्मी आँपचौरका मिलन केसी हरेक दिन नेपाली मम धमाधम चखाईरहेका छन् भारतीयहरुलाई । 

 राई नेपालको द्वन्द र आर्थिक दूर्बलताले गाँजेर दिक्क थिए । नेपालमा उनले नत आफ्नो सिप देखाउन पाए न अन्य बिकल्प । दुई पाखुरा खियाउने धुनमा हानिए उनीपनि अन्य थुप्रै यूवा झैं दिल्ली । कामको खोजि गर्दै हिँड्दा यस्तो उपयोगि होला भन्ने नसोचि लहै लहै मै जानेको सिपले बाटो देखायो । उनले मम पकाउने कुकको काम पाए । गत सात वर्षदेखि उनी यहि थलोमा बसेर भारतीयहरुलाई धामधम मम चखाइरहेका छन् ।

मम खसो खास कुन देशको खाना हो ? चिनियाँ ? शेर्पा ? तिब्बती ? भियतनामी ? कम्बोडियाली ? त्यसको जवाफ होला अनुसन्धानकर्मीसित । तर सुभास राई भने नेपाली खाना हो भनेर दाबीकासाथ भारतीयलाई चखाइरहेका छन् मम । उनलाई मम कुन देशको हो, किटान गर्न तिर लाग्नुपनि छैन । बास, नेपाली खाना भनेर चिनियोस्, भारतमा फैलियोस यो खाने चलन, आफ्नो गुजारा पनि चलोस्।

उनलाई शुरुमा हम्मे हम्मे परेको थियो यो मम पसल टिकाउन । बिस्तारै अहिले यसको स्वाद भारतीयहरुमा गड्दै गएको छ । भारतीयहरु मम खान पल्किँदै गएका छन् । उनको भनाईमा भारतीयहरुपनि सब्जीको भन्दा मासुकै मम बढि रुचाउँछन् । अहिले उनको पसलमा हरेक दिन मम खान  बढ्दै गएको छ । वरिपरिका सरकारी कार्यालयका कर्मचारीपनि खाजाको लागि मम संझिँदै यहिँ आउँछन् ।

 हुनत यहाँ मम खानेहरु नेपालीहरुपनि छन् । तर उनका मुख्य ग्राहक भनेका भारतीयनै हुन् । उनको पसलले दिल्लीको यस बजारमा खरिद बिक्रिकालागि पुगेका नेपालीसित भेटघाट गराउने सम्पर्क थलोको कामपनि गरेको छ । कतिपय नेपाली मम खान पाइन्छ रे भन्दै पनि यहाँ आउने गरेका  छन् । हुनपनि उनको मम यति लोकप्रिय भैसक्यो कि उनको देखासिकि गरेर उनैको पसल वरिपरि अन्य भारतीयले समेत मम पसल खोलेका छन् ।

 दिल्लीमा नेपालीको पौरखकै कारण नेपाली मम फैलिँदै गएको छ । नेपालीले केहि हदसम्म रोजगारपनि पाएका छन् । मम पकाए बापत मासिक सात हजार भारतीय रुपियाँ तलब खाने सुभास राईको भनाईमा रेस्टुरेन्टमा अन्य खाना पकाउनु भन्दा मम पकाउनेको माग बढि छ र  त तलब पनि अलि बढिनै पाइन्छ ।