- भीम के सी कमल / लिस्बन्,पोर्चुगल

 छेपारे रङ झैं फेरीइरहने बडेबडेको बोली हेर

 आमा भईन लथालिंग, बुद्ध आँखा खोली हेर ।

 भाई भाईको झगडामा पराई पाठ सिकाउने

 तल माथि उत्तर दक्षिण, बन्न थाले टोली हेर ।

 शान्ति जप्ने, लट्ठी नाप्ने सत्ता शक्ती सँग सँगै

 निर्धा ताकी बर्सी रहने, रोक्नु पर्छ गोली हेर ।

 कहिले अड्डी कहिले धम्की घात प्रतिघातहरु

 बिर्स अतीत, मिल आज; अनि स्वर्णिम् भोली हेर ।

 उन्नतिमा लम्की रहन नयाँ मार्ग भेट्नु पर्छ

 दीन् भाव कुण्ठा त्यागी, बिजयको रोली हेर ।

 हिंसा, क्रोध, मुर्खतालाई पर भगाउँ भन्छ ‘कमल’

 आशिर्बादको खाँचो बुद्ध,ज्ञान चक्षु खोली हेर ।