असार त अलि पहिलेनै लागेको हो । तर आज फटाफटा असारे धान रोपेको, हलो जोतेको र बिउ काढेको फोटोहरु देखेपछि साह्रै याद आयो रोपाईको । तपाईहरु मध्ये कतिले काढ्नुभो बिउ ? कतिले लाउनु भो बाउसे ? झरी र पानीमा भिज्दै काम गर्नु भएको छ ? छेउकुना खन्ने, हिलो बनाउने, रोपाहारहरुसँग हिलो खेल्ने । गाउँघरमा बनेको मकै, चिउरा, भुटेको भटमास यस्तै यस्तै खाजासँग रमाउने । हिलाम्मे बन्ने । अनि वर्षदिनका लागि जोहो गर्ने खेतिको शुरुवात गर्ने । कति रमाईलो हुन्छ वरिपरि सारा छरछिमेकमा पनि त्यसैगरि हलका हल गोरु ले जोतेको हेर्न ! 

पानी गुगुलु गर्दै कराएको । वरिपरि साराका सारा हिलोमा नाचेको अनि असारेगित गुञ्जिएको !! मैले त सबै काम गरेको हुँ । छेउ कुना खन्ने, आली लगाउने, लेड्कोमा (हेगा भन्छन चितवनतिर) चढेर नमिलेको गह्रा सम्याउने, बिउ बोक्ने, उखेल्ने, घाँस काट्ने, गाईगोरु चराउने, खाजा लिएर जाने सब का सब । 

महिलाहरुसँग मिलेर बिउ रोप्न जाँदा “खेत रोप्ने होइन छोरा मान्छेले” भनेर ठुला दाईहरुले उर्दी लगाउँथे अनि लुकेर गइन्थ्यो दिदीहरुको समूहमा र रोपिन्थ्यो धान अनि गाइन्थ्यो गीत । त्यो बेलाको याद खुब आयो मलाईपनि । तपाइहरु मध्ये कति परिचित हुनुहोला यो रोपाइसँग ? असारे गतिबिधिसँग ? कतिले सुन्नु भाको होला असारे गीत ? यसलाई रोपाइ गीत पनि भनिन्छ। यो त नितान्त फरक हुन्छ नि ! अरु बेला सुनिदैन यो। रोपाइ गर्दामात्रै गाइन्छ। रोपाइको विशेष गीत हो यो ।

तपाइहरु मध्ये धेरै जसो बिदेशमा हुनुहुन्छ होला । त्यो याद नहोला । रोपाई गर्नु भएकोपनि छैन होला । तर तपाईका दिदी, बहिनी, दाजु भाई, काका काकी वा साथीभाई र गाउँलेहरु मध्ये कोही न कोही अहिले पक्कैपनि रोपाइमा धमर्धुस लगाइरहेका छन । खेतमै आफै सहभागि हुन त सकिएन नै, कम्सेकम त्यो द्रिष्य हेरेर याद त गरौं, कि कसो ? यू टुबको यो लिंकमा क्लिक   गरेर रोपाइको भिडियो हेर्नुहोस ।