-नास्तिक / बंगलादेश

युद्धको दुन्दुभी मच्चाएर

अट्टहास गर्दै

फेरि शान्तिको लागि भन्दै

विदेशी प्रभुसँग

हतियारको भिख मागेर

सत्तामा शान्त हुन चाहन्छ

भिखारी शासक !

°°°°°°°°°°°°°°°°°°°°°°

दिनरात टेलिभिजनका पर्दाहरुमा

दाँत ङिच्च्याएर

“हामी शान्ति चाहन्छौ”

भनिसकेर

लगत्तै

हेलिकप्टरबाट बारुदको गोला

झार्ने आदेश दिन चाहन्छ

नौटंकी युद्धप्रेमी शासक !

°°°°°°°°°°°°°°°°°°°°°°

विदेशीको खटनमा

खाईपिई गरेर

शौच गरेर

उठबस गरेर

अन्त्यमा, म स्वतन्त्र देशको

स्वतन्त्र नागरिक भन्छ

मूख्यमन्त्री दास शासक !

°°°°°°°°°°°°°°°°°°°°°°

कवितामा अलिकति हाँसोखुशी भरुँ भन्छु

कसैलाई गाली नगरुँ भन्छु

पटक पटक मलाई असफल बनाउँछ

ज्यानमारा राष्ट्रघाती शासक !!