नङ्ग्राले झाम्टा मारेर शिकार फुत्कियो भने कस्तो हुन्छ बाघलाई ? भन्छन् बहुलाउँछ । अनि शिकार ताकेर बसेको बाघलाई शिकार गर्न बाधा पार्‍यो भने ? उपनि त्यसै गरि रन्थनिन्छ । रिसले आगो बन्छ । माधव नेपाल प्रधानमन्त्रीको शिकार फुत्किएर बहुलाए जस्ता भएका छन् । उता नेपालको हातबाट फुत्किएको शिकार ताकेर बसेका छन् एमाले अध्यक्ष झलनाथ खनाल । खनाल अघि देखिनै माओवादीलाई एक्लै छोड्न हुन्न भन्ने नरमपन्थी । उता नेपाल माओवादीका कट्टर विरोधी । नेपालमाथि दक्षिणपन्थी धारतिर निकट भएको आरोप लगाउँदै आएका खनाल पक्षले । उता माओवादीको समर्थक र आफ्नै सरकारको विरोधी भएको खनालमाथि आरोप लगाउँदै आएका नेपाल पक्षले । दुबै पक्षको भित्रभित्र नीतिगत मारामार त थियो नै । तर गत शनीबार चाहिँ प्रधानमन्त्री नेपाल र पार्टी अध्यक्ष खनालबिच झण्डै पिटापिट नै भएछ ।

नेता, सेना र दरबार भित्रका गोप्य क्रियाकलाप छताछुल्ल पार्न कहलिएको पत्रीका न पर्‍यो जनआस्था साप्ताहिक । आजको अंकमा उसले नेपाल-खनालबिच पर्नै लागेको मारपिटका बारेमा सारा खोतलेर सार्वजनिक गरेको छ । शनिवार एमालेको स्थायी समितिको बैठक डाकिएको रहेछ बिहान । निहुँ खोज्ने त जहाँपनि केपी ओली नै भैहाले । त्यस बिहानपनि ओलीले खनाललाई संसदीय दलको नेता वा पार्टी अध्यक्ष मध्ये एउटा पद मात्रै लिनुपर्छ भनेछन् खनाललाई । त्यो छिनोफानो नभइ बैठक बस्न नसक्ने सक्दैन भनेपछि खनाल तात्तिएछन् । खनालले आफूलाई पार्टी भित्रैबाट असहयोग भएको, खुट्टा तान्ने काम गरेको र केन्द्रीय कमिटीमा हनुमान चलाउने काम गरेको आरोप लगाएछन् ।

अनि त नेपाल जुरुक्क उठेर खनालमाथि जाइ लागे । खनालले पार्टीलाई धूलो पारेको, माओवादीको दलाली गरेर आफ्नै सरकार गिराउन लागेको, ०४८ को आम निर्वाचनपछि खनालले संसदीय दलको उपनेता नपाउँदा संसदको ब्याक बेन्चमा गएर बसेको, आधिकारिक उम्मेदवारलाई राष्ट्रिय सभामा हराउन बोगटी काण्ड मच्चाएको, पार्टीको निर्णय बोक्न नसकेको, उनको निजी महत्त्वाकांक्षा चुलिएको, प्रधानसेनापतिलाई निकाल्ने भनेर माओवादीसित गोप्य सहमती गरेको आरोपपनि लगाएछन् । लगायतका आरोप लगाएछन् । पार्टी अध्यक्ष चलाउन असफल भएकोले महाधिवेशन बोलाउनुपर्ने माग समेत गरेछन् ।

खनालपनि के कम ? उनले पनि जवाफ दिए- तपाईंले १५ वर्ष पार्टी चलाएको पनि देखियो, यत्रो पार्टी ३३ सिटमा झरेको पनि भोगियो । बालुवाटारमा बसेर तपाइले के के गरिरहनु भएको छ भन्ने सबै जानकारी मलाई छ भनेर धम्क्याए । अनि नेपाल निकै आक्रोशित बने । अनुहार रातो भएछ । अनि झलनाथको नाकैमा औंलो लगेर खनालको खोइरो खन्न थालेछन् । खनाल को अनुहार रातो भएछ । उनी थरर काप्न थालेछन् । अनि खनालले पनि ‘मलाई असफल बनाएर को सफल हुँदो रैछ देखाइदिन्छु’ भनेर नेपालको नाकतिर औंलो सोझ्याउँदै चुनौती दिएछन् । नेपाल र ओलीबिच कुटाकुटको स्थिति बनेपछि केन्द्रीय कमिटीको बैठकको मिति तोक्न बसेको बैठक त्यस विषयमा कुनै निर्णय नगरी समाप्त भएछ ।