भ्रमणबाट बेल्जियम फर्किँदा कोरोना परिक्षण नगर्नेलाई २५० युरो जरिवाना

बेल्जियम सरकारले यात्राबाट बेल्जियम फर्कने हरेक यात्रुलाई कोरोना परिक्षण नगरेको खण्डमा प्रति ब्यक्ति दुई सय ५० युरोका दरले जरिवाना तिर्नुपर्ने निर्णय बनाएको छ । यो नियम वुधवारबाटै लागु हुनेगरि न्याय मन्त्रि भिन्सेन्स भान क्वीकेनवोर्नले घोषणा गरेका हुन् ।

यो नियम कार्यान्वयन भइसकेको छ । नियम पालना नगर्नेलाई यस अघिको मास्क नलगाउने, दुरी कायम नगर्ने, समूमा बस्ने, भेला र जमघट गर्ने जस्ता गलत काम गर्ने, नियम पालना नगर्ने गरेमा तिर्नुपर्ने नियम अनुसारकै जरिवाना लगाउने निर्णय भएको हो । यो परिक्षण विदेसबाट आइपुगेको एक देखि आठ दिन भित्रमा गरिसक्नुपर्ने छ ।

जरिवाना लिनको लागि यात्रा गर्दा जुन ब्यक्तिगत विवरण कम्प्युटरमा भरिएको हुन्छ त्यसैको आधारमा कुनै ब्यक्तिले भ्रमण पछि बेल्जियममा आएर कोरोना परिक्षण गरेनगरेको पत्ता लगाइन्छ । जुन यात्रुले यात्रा गर्दा भर्ने यात्रु लोकेटर फर्म (यात्राको परिचय खुल्ने फर्म) को सहयोगमा गरिन्छ । त्यसकै आधारमा परिक्षण गरे नगरेको पत्ता लाग्ने छ । तथ्यांक पद्दतीले सबै देखाउने भएकाले बोल्नै नपर्ने, सम्पर्क गर्नै नपर्ने न्यायमन्त्रीले जनाएका छन् । यसको पद्दती ट्राफिक नियमको पालना नगरेमा जरिवाना आए जस्तै तरिकाको भएको उनको भनाई छ ।

त्यसो त यात्रुले अनिवार्य बस्नुपर्ने छ दिने क्वारिन्टाइन नबसेमा, अवज्ञा गरेमा पनि दुईसय ५० युरो जरिवाना तिराउने भएको छ ।

अहिले समय सहज छैन । घरमा नियन्त्रण गर्न कोहि आउँदैन । तर कुनै पनि गलत काम गरेको, सरकारी नियम अवज्ञा गरेको भेटिएमा जरिवाना लगाउन थालिएको छ । पसलमा केहि सामान किन्न गएको वा अन्यत्र पुगेको रेकर्ड भेटिएमा सहजै जरिवाना लगाइने छ । अझ गम्भिर त के छ भने यस्ता अवज्ञाका घटना कसैको दोहोरिएमा त्यस्तो ब्यक्ति अदालतमा जानुपर्ने पनि न्याय मन्त्रीले घोषणा गरेका छन् ।