प्रम ओलीले डाकेको चिकित्सा शिक्षा आयोग बैठक बिरुद्ध नागरिक समाजले बालुवाटार पिपलबोटमा प्रदर्शन गर्ने

प्रधानमन्त्री केपी शर्मा ओलीले आजै प्रधानमन्त्री निवास बालुवाटारमा डाकेको चिकित्सा शिक्षा आयोग बैठकको बिरुद्धमा नागरिक समाजले बालुवाटार पिपलबोटमा आकस्मिक प्रदर्शन गर्ने भएको छ । प्रधानमन्त्री केपी शर्मा ओलीले केही अन्य मेडिकल कलेजहरुलाई सम्बन्धन दिनका निमित्त यो बैठक डाकेको बालुवाटार श्रोतले जनाएको छ ।

श्रोतका अनुसार शुक्रबार नै केही नयाँँ मेडिकल कलेजहरुलाई सम्बन्धन दिने निर्णय हुन सक्दछ । नागरिक आन्दोलन समितिले वर्तमान सरकारले चलाएको स्वास्थ्यको ब्यापारिकरणका बिरुद्दमा शुक्रवार बिहान एघार बजे प्रदर्शन गर्न लागेको जनाएको छ । आन्दोलनमा साहित्यकार खगेन्द्र संग्रौला, पत्रकार नारायण वाग्ले, लेखक संजीव उप्रेती लगायतका अगुवाहरु छन । उनिहरुले भनेका छन “स्वास्थ्य सेवा जनताको मौलिक हक र राज्यको जिम्मेवारी हो । तर बिद्यमान कोरोना महामारिमा जनताको यो अधिकारको ब्यापक हनन भएको छ र राज्य आफ्नो जिम्मेवारीबाट च्युत भएको छ ।”

“अझ सर्वोच अदालतको निर्णय विपरित केही नजिकका ब्यक्तिहरुका मेडिकल कलेजहरुलाई सम्बन्धन दिने तयारी गर्नु गैर कानुनी त हुँदै हो, यसलाई रोक्नु नागरिकको कर्तब्य पनि हो” आन्दोलन समितिले भनेको छ ।

स्वास्थ्य क्षेत्र सुधारको माग गर्दै डा गोविन्द केसीले दुई दर्जन भन्दा बढी पटक अनशन बसीसकेका छन भने सरकारले हरेक पटक माग पुरा गर्ने प्रतिवद्धता ब्यक्त गर्दै आएको छ । तर देश महामारी र अन्य विषयमा रुमल्लिईरहेको बेला बलजफ्ती चिकित्सा शिक्षा आयोगको बैठक बोलाएर केही आसेपासेहरुको फाईदाका लागि मात्र निर्णय गराउन खोज्नु दुराशयपूर्ण हो” अगुवाहरुले भनेका छन ।

उनिहरुको भनाई छ “चिकित्सा शिक्षाको होस् वा जनस्वास्थ्य पुर्वाधार वा निती निर्माणको सवाल होस्, जनताको मौलिक हक र समुदाय केन्द्रित स्वास्थ्य सुनिश्चित हुनु पर्दछ । कुनै पनि मेडिकल कालेजलाई सम्बन्धन दिंदा सरकारले जनता प्रतिको उत्तरदायित्व भुल्न मिल्दैन । सिमित ब्यक्तिको फाईदाका लागि सरकारले कसरी पुरै देशबासिको स्वास्थ्यमा खेलवाड गर्न सक्दछ ?” नागरिक आन्दोलनद्वारा जारी बिज्ञप्तीमा भनिएको छ ।

बिज्ञप्तिमा अगाडि उल्लेख छ “जनस्वास्थ्यको बजारिकरणलाई एक कदम अगाडि बढाउने यस्ता कृयाकलापको नागरिक आन्दोलन घृणापुर्वक भ्रत्सना गर्दछ । लोकतान्त्रिक प्रकृया र संविधानलाई नै घातक प्रहार गर्ने उद्यत ओली सरकार चिकित्सा शिक्षा आयोगको स्वायत्ततामा समेत अंकुश लगाउने तयारीमा छ ।” नागरिक आन्दोलनले डा गोविन्द केसीको अभियान प्रती ऐक्यवद्दता जनाउँदै जनस्वास्थ्यमा ओली सरकार स्वेच्छाचारीका बिरुद्दमा उत्रिन स्वास्थ्यकर्मी, पेशाकर्मी तथा नागरिक हरुलाई अपिल गरेको छ । आन्दोलनका एकजना अगुवाका अनुसार शुक्रवार बालुवाटारमा हुन लागेको प्रदर्शनमा सामाजिक दुरि कायम गरिने छ ।