बिहीबार, जेठ १२, २०७९

युद्ध रोक्न आग्रह गर्दै रुसी दुतावास अगाडि प्रदर्शन

नेपालप्लस संवाददाता / काठमाडौं२०७८ फागुन ११ गते १६:००

रुसलाई तत्काल युद्ध रोक्न र शान्ति प्रवर्धन गर्न विशेष आग्रहसहित मानव अधिकार तथा शान्ति समाजले बुधवार नेपालस्थित रुसी राजदुतावास बालुवाटार अगाडि प्रदर्शन गरेको छ ।

दिउँसो १ बजेदेखि आघा घण्टासम्म गरिएको प्रदर्शनमा शान्तिवादीहरुले ‘रुस, युक्रेनमाथि अतिक्रमण बन्द गर, तत्काल सैनिक फिर्ता गर, युद्ध रोक, शान्ति प्रवर्धन गर’ भन्दै ध्यानाकर्षण गराएका थिए ।

प्रदर्शन पश्चात मानव अधिकार तथा शान्ति समाजका तर्फबाट रुसका राष्ट्रपति भ्लादिमिर पुटिनलाई लेखिएको पत्र नेपालस्थित रुसी राजदुतावासका अधिकारीलाई हस्तान्तरण गरिएको थियो ।

पत्रमा युद्धले लाखौं करोडौं मानिसहरुको अधिकारमाथि घात गर्ने हुँदा कुनै पनि हालतमा युद्ध हुनुहुँदैन र शान्तिपूर्ण तवरमा हरेक समस्याको समाधान खोजिनुपर्छ भन्ने शान्ति समाजको मान्यता रहेको उल्लेख छ ।

रुसी राष्ट्रपति पुटिनलाई लेखिएको पत्रमा ‘भर्खरै मात्र युक्रेन सन्दर्भमा रुसले गरेको निर्णयबाट मानव अधिकार तथा शान्ति समाज एवं शान्ति समाजमा आवद्ध दशौं हजार सदस्य तथा शुभचिन्तकहरु अत्यन्त चिन्तित भएको जनाउँदै मित्र राष्ट्र रुसलाई तत्काल सेना फिर्तासहित युद्ध रोक्न र शान्ति प्रवद्र्धन गर्नका लागि मानव अधिकार तथा शान्ति समाज विशेष आग्रह गर्दछ’ भनिएको छ ।

प्रदर्शनमा मानव अधिकार तथा शान्ति समाजका संस्थापक सभापति कृष्ण पहाडी, सभापति गोविन्द खनाल, सल्लाहकारहरु होमकान्त चौलागाई र उत्तम पुडासैनी, संस्थापक सदस्य कृष्ण कँडेल, महासचिव रामकृष्ण बराल, पूर्व उपसभापति रेनुका पौडेल, कोषाध्यक्ष जगन्नाथ पुडासैनी, सचिव बन्दना सिंह, अपिल समिति संयोजक बलबहादुर गाहा मगर र सदस्य ईश्वरा लिङदेन थिए ।

त्यस्तै, केन्द्रीय सदस्यहरु चन्द्रमणी बञ्जारा र किरण ढकाल, पूर्व केन्द्रीय सदस्य दुर्गा राना (लक्ष्मी), काठमाडौं शाखा का।वा सभापति भगवान पुडासैनी, ललितपुर शाखा सभापति संजोग चाम्लिङ राई, चितवन शाखा सभापति शम्भु राउत, काठमाडौं शाखा पूर्व सभापति ईश्वर पुडासैनी, काठमाडौं शाखा सहसचिव रमेश बराल, आजीवन सदस्यहरु तुलसीराम भण्डारी, दिवाकर पुडासैनी, आरसी भण्डारी, विकास थापा लगायत चार दर्जन शान्तिवादीहरुको सहभागिता थियो ।

तपाइँको प्रतिक्रिया

फेसबुक